Unë quhem Taif. Jam 35 vjeç, i martuar dhe kam dy djem. Doja të ndërtoja në Gjermani një jetë në siguri për familjen time dhe me një perspektivë profesionale.
Por atje nuk morëm një leje qëndrimi. Pasi u kthyem në Irak gjetëm atë që kërkonim. Me pak kapital fillestar unë munda të hap një ofiçinë për makina.

Përpara se të largoheshim për në Gjermani unë fitoja para si punëtor me ditë në një kantier ndërtimi. Ndihmoja si saldator gjatë shtrimit të tubacioneve për ujë dhe telave elektrikë. Në vitin 2015 gjendja në Irak lidhur me sigurinë u keqësua dhe ne shkuam në Gjermani.

Këshillim përmes GMAC

Ëndrra ime për të gjetur një punë të mirë në Gjermani, për të fituar para që t’i mundësoja familjes një jetesë më të mirë, për fat të keq nuk u realizua. Pasi pata bërë një ekuivalentim me një kurs tremujor në farkëtari, arrita të gjej punë për njëfarë kohe në një fabrikë. Por burokracia dhe barriera e gjuhës më lodhnin shumë. Pasi nuk përfituam as lejen e qëndrimit, vendosëm të ktheheshim në Irak.

Fillimisht iu drejtuam autoriteteve gjermane. Ata organizuan kthimin për ne. Përveç kësaj ata na informuan lidhur me organizatat që u ofrojnë përkrahje personave të kthyer në Irak. Pasi u kthyem në Irak pothuajse nuk kisha para dhe nuk dija nga t’ia filloja për ta organizuar rishtas jetën tonë. Një vit e gjysmë pas kthimit kontaktova “Qendrën Gjermane për Punësim, Emigracion dhe Riintegrim” (Deutsches Zentrum für Jobs, Migration und Reintegration, GMAC), siç na kishin këshilluar edhe në Gjermani.

Përkrahje në hapjen e një biznesi privat

GMAC më këshilloi për ofertat e ndryshme duke u mbështetur në përshtypjet e grupit të punës dhe në aftësitë e mia. Përveç kësaj qendra e mësipërme më ndërmjetësoi pranë “Organizatës Ndërkombëtare për Emigracion” (Internationale Organisation für Migration, IOM). Atje përfitova këshillimin dhe përkrahjen për të cilat kisha nevojë që të mund të hapja punishten time.

Qysh nga ajo kohë jeta ime ka ndryshuar: jemi më mirë, si personalisht ashtu edhe profesionalisht. Jam i gëzuar që jam përsëri në shtëpi – në vendin tim, pranë familjes sime. Këtu e kam realizuar ëndrrën time dhe kam sukses. Përvojën praktike dhe gjuhësore që grumbulluam në Gjermani e kemi sjellë me vete në atdheun tonë. Edhe gruaja ime mund ta gjejë veten profesionalisht. Këtu në Irak ajo filloi përsëri studimet për juridik dhe i përfundoi. Tani punon si avokate.

Botuar më: 03/2021