Një punë në hotel u ofron shumë shqiptareve dhe shqiptarëve një perspektivë të re punësimi. Vendi po tërheq gjithmonë e më shumë turistë – por mungon akoma personeli i kualifikuar. Artani dhe Sidorela morën pjesë në një trajnim të shkurtër tetë javor.

Turizmi po bëhet gjithmonë e më i rëndësishëm për Shqipërinë. Gjithmonë e më shumë turistë janë të interesuar për të bërë pushimet atje. Në çdo sezon hapen hotele të reja, por personeli i kualifikuar është i pakët. Artani dhe Sidorela po e shfrytëzojnë këtë shans.

Një shans i mirë

Megjithëse turizmi ofron një perspektivë të mirë, shumë shqiptare dhe shqiptarë përsëri kërkojnë punë jashtë vendit – më të shumtën pa sukses. “Qendra Gjermane e Informacionit për Migracion, Arsim Profesional dhe Karrierë“ (Das Deutsche Informationszentrum für Migration, Ausbildung und Karriere, DIMAK) në Shqipëri ofron çdo vit kualifikime të ndryshme për mundësi më të mira punësimi. Në vitin 2022, 160 persona morën pjesë në trajnimin dhe praktikën e punës “Puna në hotel“. Gjatë kualifikimit tetë javor pjesëmarrësit u njohën me sektorët dhe fushat e zbatimit të funksionimit të hotelit. Në vitin 2023 në këtë ofertë do të marrin pjesë 80 persona të tjerë.

“Me qëllim që në kurs të kenë mundësi për të marrë pjesë shumë pjesëmarrës, DIMAK-u përzgjodhi katër hotele në katër qytete shqiptare, në Shkodër, Tiranë, Durrës dhe Vlorë. Pjesëmarrësit punuan në fushën e recepcionit, barit, restorantit, shërbimit të klientëve dhe kuzhinës”, shpjegon Zana Dobruna. Ajo është këshilltare për përkrahjen e punësimit pranë DIMAK-ut në Shqipëri. “Shumë prej pjesëmarrësve janë kthyer nga jashtë dhe dëshirojnë një fillim të ri në Shqipëri“, thotë Dobruna. Kështu p.sh. Artani, një burrë 53 vjeçar, i cili mori pjesë me sukses në kurs në verën e vitit 2022. Në përfundim ai gjeti një vend pune në kuzhinën e një hoteli. “Trajnimi qe gjëja më e mire që mund të më ndodhte mua për moshën që kam”, tregon Artani.

Indirekt tek puna e ëndërruar

Më parë ai ishte përpjekur më kot bashkë me gruan e tij që të bënin kërkesën për azil në Gjermani. Kjo kërkesë ju refuzua dy herë. Kur u kthye në Shqipëri nuk kishte as para, as punë që të mund të kujdesej për familjen e tij. Njohuritë bazë që zotëronte si rrobaqepës dhe hidraulik nuk e ndihmuan mjaftueshëm për më tej. Për një farë kohe ai bashkë me të shoqen u strehuan tek të njohurit e tyre, sepse shtëpia që kishin u dëmtua nga një tërmet që ra. Artani ktheu vëmendjen tek një brodhurë që I kishin dhënë teksa ishte ende në Gjermani. Ai kontaktoi DIMAK dhe këshilltarët e ftuan për një takim. Ai pranoi menjëherë ofertën që i bënë për të marrë pjesë në kualifikimin e shkurtër në hotel. Edhe babai i tij kishte punuar si kuzhinier. Qysh fëmijë ai e kishte dashur një gjë të tillë. “Akoma para se të përfundoja trajnimin, menaxheri i hotelit më ofroi një kontratë. Që prej asaj kohe punoj në kuzhinë. Ëndrra ime u bë realitet. Më shumë më pëlqen të rregulloj sallatat”, tregon me pasion Artani. Paga që merr i jep siguri atij dhe familjes së tij.

Edhe 26 vjeçarja Sidorela, e cila ka studiuar për shkenca shoqërore dëshiron të punojë si kuzhiniere. Ajo mori pjesë në kursin e dytë, në vjeshtën e vitit 2022. “Gatimi është pasioni im. Dhe niveli në hotelin MK në Tiranë është shumë i lartë. Atje na mësojnë shumë gjëra. Kjo përvojë do të më ndihmojë të gjej një punë në gastronomi“, thotë me bindje Sidorela. Ajo ka studiuar për letërsi shqipe, ka punuar për organizata të ndryshme jofitimprurëse dhe ndër të tjera u ka dhënë mësim fëmijëve të pastrehë. Por puna e saj ishte gjithmonë me afat të kufizuar. Kështu që Sidorela u përpoq të gjejë diçka të re. Filloi të punojë në një kuzhinë dhe i pëlqeu kjo gjë.

“Të punosh në parajsë”

Hoteli Flower, në të cilin punon Artani, ndodhe në Golem, pranë qytetit të Durrësit, në bregdet. Pas punës ai shkon shpesh në plazh dhe shijon pamjen e detit. “Ne shqiptarët shpesh dëshirojmë të largohemi nga vendi ynë. Mendojmë se jashtë Shqipërisë do të jetë më mirë. Por ne jemi parajsa e Europës. Duhet vetëm të jemi të gatshëm për të punuar. Nganjëherë për këtë gjë na nevojitet një ndihmë fillestare, si ajo që përfitova unë nga DIMAK-u”, thotë Artani.

2/2023