Duke përfituar njohuri të reja

Kush dëshiron të drejtojë me sukses një firmë private, ka nevojë për know-how të karakterit ekonomik. Një kurs që ofrohet nga „Fondacioni i Arkës së Kursimeve“ tregon se si mund të përfitohen këto njohuri në një mjedis loje.

Atmosfera është e çlirët dhe në të njëjtën kohë e përqendruar – njëlloj si gjatë një loje ku të gjithë marrin pjesë me dëshirë dhe duan të fitojnë. Djemtë e rinj kanë mësuar gjatë „Micro Business Game“ shumë gjëra, të cilat duhet t’i dijë dikush që do të zhvillojë një aktivitet ekonomik privat: Cilat janë arsyet për suksesin dhe vështirësitë e mundshme të firmave të vogla private? Si bëhet përllogaritja e shpenzimeve dhe e të ardhurave? Si mund të gjendet një bankë e përshtatshme? Si mund të bëhet përkujdesja e klienteve dhe klientëve? Si mund të reagohet karshi ndryshimeve që pëson tregu?

Këto tema trajtohen në mënyrë jo të mërzitshme në kurs, por janë të konceptuara si lojë në kuptimin e vërtetë të fjalës. Duke qenë se trajnimi zhvillohet në shtator, pra akoma para vendosjes së kufizimeve të reja për shkak të pandemisë së koronës, ai është i mundur të realizohet si një takim real me pjesëmarrje fizike. Në dhomën e seminarit në qendër të Manheimit (Mannheim) pjesëmarrësit janë ndarë në grupe pune. Çdo grup pune drejton një shitore të vogël fiktive për lëngje frutash. Përpara tyre personat që janë duke u përgatitur për të hapur një biznes privat kanë një fushë loje të madhe me portokalla të qëruar. Mbi këtë fushë loje ata lëvizin nga njëra anë në tjetrën paratë që përdorin në lojë. Ata diskutojnë se sa kushtojnë frutat. Cilat janë shpenzimet që do të kenë për rrymë elektrike dhe për taksa? Si bëhet përllogaritja e çmimit përfundimtar për lëngun e portokallit? Kush tregohet veçanërisht i shkathët gjatë lojës, e fiton atë. Por edhe të tjerët nuk humbasin. Edhe pse ata që humbasin lojën në fund të saj kanë më pak para në arkë, përsëri kanë fituar më shumë njohuri.

Të përgatitesh me kohë për një fillim të ri e të suksesshëm

„Sikur ta kisha ditur më parë këtë gjë“, thotë një ganez. Ai jeton ashtu sikurse edhe pjesëmarrësit e tjerë në një nga institucionet pranuese për refugjatë në Landin e Baden-Vyrtembergut (Baden-Württemberg). Informacionin për “Business Games” që ofron “Arka e Kursimeve” ai e ka marrë përmes një këshilltari për riintegrim dhe qendrës këshilluese për kthim të BBQ/Newplacement International (NPI). Ky fondacion i ofron këto trajnime me porosi të „Shoqatës Gjermane për Bashkëpunim Ndërkombëtar (Deutsche Gesellschaft für Internationale Zusammenarbeit, GIZ) për parapërgatitjen e një kthimi me sukses dhe të një riintegrimi. Bashkëpunimi është pjesë e programit „Perspektiva Atdheu“ që ofrohet nga „Ministria Federale Gjermane për Bashkëpunim Ekonomik dhe Zhvillim“ (Bundesministerium für wirtschaftliche Zusammenarbeit und Entwicklung, BMZ).

Tema e vendosjes së çmimeve i intereson veçanërisht pjesëmarrësit nga Gana, sepse pikërisht në këtë pikë ai dështoi me shitoren e tij të vogël për veshje në atdheun e tij. „Nuk e dija se si duhet t’i përllogarisja shpenzimet për të vendosur më në fund një çmim realist. Unë nuk arrita kurrë të nxjerr fitim“. Tani ai dëshiron të kthehet përsëri në Ganë, sepse nuk shikon asnjë lloj perspektive në Gjermani. Ai gëzohet për kualifikimin përmes “Business-Training”. „Me këto njohuri mund të filloj diçka“, thotë ai dhe bën plane për një fillim të ri.

Sukses gjatë mësimit përmes konkurrencës në formë loje

„Të mësuarit në këtë formë nuk ka të bëjë fare me teorinë e thatë. Ndërveprimi, ushtrimet praktike dhe motivimi për ta përmbyllur lojën si fitues, të gjitha këto të çojnë tek suksesi i mësimit“, thotë Felix Amoako Boampong nga „Arka e Kursimeve“. Amoako e drejton lojën në anglisht dhe herëpashere trajton më thellë tema të caktuara në tabelën e zezë. Ai është i kënaqur që të interesuarit u mblodhën bashkë përsëri, me gjithë kufizimet për shkak të pandemisë së koronës.

Lojërat funksionojnë edhe me më pak pjesëmarrës, me më shumë distancë nga njëri-tjetri dhe ajrosje të mirë.
Pas „Micro Business Game“ në dy ditët e fundit të javës së trajnimit është planifikuar një „Savings Game“ në program. Shtatë pjesëmarrësit ndahen në dy familje që luajnë me njëra-tjetrën. Bëhet fjalë për të marrë vendime jetësore, të cilat shpesh janë edhe vendime financiare. Pra: të blejmë një shtëpi apo të marrim diçka me qira? A na del të blejmë një kompjuter për fëmijët apo të kënaqemi fillimisht vetëm me gjërat e domosdoshme? Si mund të financojmë një martesë?

„Kur vendos për gjëra të tilla, duhet të gjesh një baraspeshim midis cilësisë së jetës dhe sigurisë për të ardhmen“, mendon njëri nga pjesëmarrësit. Të kursesh apo të marrësh para borxh? Për çfarëdo vendimi rruga të shpie tek banka ose institucione të tjera financuese. Si funksionon biznesi i kredisë dhe a është më mirë t’i mbyllësh paratë në një konto a në shtëpi – lidhur me këto çështje diskutojnë burrat e rinj me njëri-tjetrin. Pastaj ata luajnë. Njëri merr përsipër rolin e bankës dhe vendos lidhur me përqindjet e interesit për kreditë dhe paratë e kursyera. Pjesëmarrësit qeshin kur bëjnë pazar me paratë që përdoren për të luajtur. „Në këtë rast bëhet fjalë vërtet për të kuptuar“, mendon një burrë nga Nigeria, i cili ka ardhur në trajnim me disa njohuri paraprake ekonomike. „Në këtë këshillim për biznesin mund të mësosh vërtet në fare pak ditë, sepse mund të bësh dhe të vendosësh fare thjesht për gjithçka.“

Botuar më: 11/2020